Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Estudio di literatura ta buska koherensia den obra literario i Juliana ta kumpli ku e norma akí. E koherensia akí (elementonan konektá ku otro) ta resaltá tantu den temátika, estilo komo den e balor pronostikadó di hopi di su obranan, sigur konsiderando tempu den kua el a skirbi. E balor pronostikadó akí, resultado di opservashon skèrpi, ta presente den diferente obra di Juliana, ku ta relatá suseso ku realidat di Kòrsou lo konfirmá despues: El a pronostiká na 1982 seramentu di Refineria Shell den e poema Bola (OPI III-82), ku a tuma lugá tambe na 1985. Mésun poema ta deskribí tambe figuranan marginá, dekadensia di moral etc. tur ku a bira realidat despues. Pèn di Juliana a denunsiá inhustisia. Realidat a inspir’é i su estilo ta karakterisá pa simplesa, forsa i ingeniosidat pa integrá i elevá medionan inusual (verso, wega di mucha, orashon) na rekursonan stilístiko nobo, méskos ku papia fo’i perspektiva di promé persona.

Siguiendo e papiá eufemístiko di bieunan, e ta morde supla: kombiná krítika ku humor. Inovadó Juliana ta desafiá norma literario eksistente i krea un tipo di poesia nobo: poesia di diálogo, poesia narativo, di kòmbersashon. E ta reskatá afrikanismo den forma di ripití: El a kana, el a kana, el a kana, el a kana, el a kana; kambiando nuanse kada bes i karga bo bai, penetrá masha hundu. Juliana a defend’é kontra e kalifikashon primitivo: “Ta un dje kosnan di balor di nos pueblo (...) ku mes nos no a lanta kuné. Semper bai nan a bisa bo sivilisashon ta di Oropa, ke men Hulanda. Por yega asina leu ku tur kos ta Hulanda. Ta un kos so nan no a bisa, esei ta ku Kristu a nase na Amsterdam.” Ritmo i dominio di papiamentu ta haña dimenshon nobo serka maestro Juliana, manera den seri di vèrbo, típiko di idiomanan kreol, kreando ritmo aselerá i esfera spesial: Mosa a bula lanta kana bai porta. Echa cuenta, kuentanan di literatura oral notá fo’i bieunan eksaktamente manera kontá, ta un dje reskatenan mas importante di Juliana. Estilo di un outor ta un variante di norma eksistente. Pa e definishon nobo ku el a duna literatura, por papia di julianisashon di norma literario antiano.

Bola Den mi bola di kristal
mi ta mira den futuro.
Den mi orea sapu ta yora
un kantika di mizeria.

Mi ta mira mi próhimo
disfrasá na eskeleto
lorá den klechi di papel
ta kana tene na muraya.

Mi ta mira un pareha
ta gatia subi trap’i Kranshi.
Madrina a keda ’bou ta pela
kabaron di awa dushi.

Mi ta mira un entiero.
Kuater hòmber ku machete
ta karga morto di moral
lorá den blach’i ramakoko.

Mi ta mira kakalaka sali
fo’i pipanan frusá di Isla.
Un imahen kibrá ta parti
komunion pa totolika

I den fondo leu ayá
lamá di dignidat a seka.
Nos ta hunga ‘tapa kara’
Hasi bèrgwensa ta pa Dios.

Elis Juliana OPI-III:82
PROKLAMASHON (1di yüli 1863 – 2003)

Pa bondat di Reino
Ami Gran Poderoso
sin remordimiento
di kulpabilidat
den ningun ladronisia
den negoshi humano,
sin mi kurason bati
ta regalá boso awe
sin kobra un sèn chikí
pa tur e bondat
durante dos siglo,
ku forsa inmediato
boso LIBERTAT.

Kòrda semper si
ku ta Yu boso tabata
i Yu boso ta keda
te dia galiña Gueni
saka djente di koper
pone webu di oro
den nèshi kolonial
di kouchi hulandes

Elis Juliana 2003