Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Den e kasi 40 añanan ku Elis Juliana ta tene eksposishon di pintura i skultura, hopi pais i públiko a sera konosí ku su arte i, pa medio di esaki, ku Kòrsou. Pa un selekshon, mira nota. For di añanan 60 Elis Juliana ta kuminsá skulpi figuranan impreshonante for di piedra di laman. Eksperimentá ta inherente na Juliana, pues no ta sorprendente ku riba tereno di skultura tambe e ta manifestá esaki. Inovadó Juliana ta uza koral inusual pa krea su imáhennan. Mester trata e koral akí - yamá tambe piedra muhé –, un tipo di piedra lihé, ku masha kuidou. Kontrali na loke e nòmber ta sugerí e no ta piedra di koral ma koral di laman ku pa motibu di su peso lihé ta drif bin ariba. Piedra machu ta piedra duru, pegá den fòndu di laman. Piedra di koral mes ta masha pisá. Te ainda informashon ta mustra no tin na Kòrsou otro skultor di koral di laman.

Konosedónan ta pretendé ku pafó tampoko no ta konosí ku tin. Juliana ta konsistente den uzo di loke ta propio di Kòrsou pa su siensia i su arte. E ta traha segun e prinsipio di kita partinan dje material original enbes di agregá na e material, hasiendo uzo dje forma básiko ku e material tin kaba. E téknika akí ta mas delikado i difísil: e mas mínimo moveshon malu por kousa daño ireparabel. Un di su ophetonan preferí pa skulpi ta muhé, prinsipalmente muhé na estado. Algun título di su skulturanan: Muhé, Muhé na soño, Ensinta, Fertilidat, Sekreto femenino, Mama ku yu, Yab’i futuro, Machu kumplidó. E último akí ta karakterístiko pa e manera ku arte ta sirbi Juliana su propósitonan analítiko, krítiko i edukativo: un hòmber ta karga su enorme parti íntimo riba su lomba.