Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Elis Juliana ta okupá su mes ku e sentido profundo di eksistensia humano. E no ta keda kontentu konstatando so ku nos ta presente i e forma den kua nos ta presente. Komo opservadó skèrpi niun detaye no ta skapa su registrashon mikroskópiko. E por reakshoná di shòk riba kosnan remarkabel, pa despues deseá di nunka no a mira nan pa e doló i asombro ku nan ta kousa. E mésun shòk akí públiko ta haña ora Juliana present’é su deskubrimentunan. Tin tambe su kapasidat pa interpretá e loke e registrá ku masha kredibilidat. E ta hasi sièrtu pregunta di karakter filosófiko. E kombinashon di opservashon serio i interpretadó di prosesonan rondó di nos, ta hasi Juliana un filósofo di bida ku ta revelá i demaská. El a yega na su revelashonnan buskando bèrdat serka bieunan, loke a pèrmitié desaroyá su teoria di eufemismo afrikano òf wega di tapa kara, komportashon propio di hende kolonisá ku ta pretendé di ta algu ku e no ta i no ke ta loke realmente e ta. Juliana sa adoptá tres diferente aktitut relashoná ku e tragedia akí:
- aktitut di kurasoleño profundamente tristu ku ta hari su mes tragedia
- aktitut di edukadó ku ta indiká kaminda pa progresá
- aktitut di hende ku ta resigná pasó e ta papia enbano.
Juliana a pinta su mes komo un kurasoleño igual na tur otro, ku ta sufri dje mésun defisiensianan ku tur otro. Tur esakinan ta marka un momentu di konsientisashon importante den proseso di emansipashon kultural i desaroyo nashonal.