Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Julianismo: konsiensia, integrashon i kontinuidat Forrrrma di papia Kiko e ‘forrrrma di papia’ di Elis Juliana ta enserá? Kua ta e liña komun ku ta sali for di e arte- i siensianan praktiká pa Elis Juliana? Por definí e liña komun akí? Por papia di un koriente, esta julianismo?

Metáfora Forrrrma di Papia (énfasis JC) no ta referí na un òf otro forma di papia ni di Juliana, ni di otro persona. Bieunan sa bisa na tambú: “Mi t’ei ‘papia’ un palabra” i nan ke men “Mi t’ei kanta.” Ke men ‘papia’ ta igual na kanta den konteksto di tambú. Igualmente, manera Elis Juliana a splika: “Ora un bieu bisa ku na seú ta ‘toka’ (énfasis JC) bastèl, mester komprendé ku ta balia bastèl. (Guia Etnológiko1:26). Den e mésun liña forrrrma di ‘papia’ ta referí aki na forma di aktua karakterístiko pa Elis Juliana i no na loke el a papia. E énfasis ekspresá ku e múltipel lèter ‘r’ ta reprodusí e papiá típiko di Juliana ku ta indiká asina kuantu importansha mester atribuí na e forma di papia di grandinan. E énfasis akí a mustra tambe ku tras di e forma di papia ei tin hopi elemento importante mas, kargá ku kódigo sekreto. Si analisá e forma di papia ei, ta bira kla ku mas ku un forma di papia, e ta un forma di biba, un realidat: e forma ku grandinan a adoptá pa por sobrebibí: “Konfrontá ku un sistema di opreshon ku no tabata pèrmití ningun partisipashon di dje ku no ta trabou fòrsá, el a buska formanan pa adaptá pa e por sobrebibí. E sobrebibensia akí, marká pa silensio, pa papia sin bisa, pa wak sin mira i eksistí sin t’ei, a resultá alolargu den sistemanan di kamuflahe i destrukshon propio ku a pasa di tata pa yu.” (Clemencia,1989:41).
E forma ei di negashon i odio propio Juliana a kapta i atribuí na kolonisashon i sklabitut. I t’e Juliana a pidi pa ‘Lòs e mucha’ for di dje pa e por kana liber atrobe, “buska su mes identidat” i pa “dun’é un piki di orguyo p’e koba un buraku hundu dera bèrgwensa, (...) kompleho, (...) frustrashon." (Juliana 1977). Ta e mésun piki el a pidi (‘Fiami un piki’) pa koba saka. E trabou di ‘lòs’ i ‘koba’ akí ta trabou di bida di Elis Juliana, ku a kontraponé na e influensha asina profundo menshoná un influensha mésun fuerte di rekuperashon di herensia pèrdí pa krea konfiansa propio bèk. Kon esaki a manifestá den su trabou?

Konsiensia emansipatorio E prinsipal fuente di informashon pa e inbestigadó Juliana –den tempu ku hende lokal no tabata hasi e tipo di trabou akí - ta pueblo, prinsipalmente grandinan. I pasobra el a konsiderá kultura di sumo importansha el a inbestigá i dokumentá pueblo di tur region i parti di su pais. Sinembargo pueblo no tabata solamente fuente di informashon pa Juliana. Juliana a debolb’é su datonan na un manera sistematisá i reevaluá, ku balor agregá, pasobra el a yama e datonan balioso. El a tuma e desishon pa elevá nan na nivel di un método di inbestigashon i a internashonalisá nan via publikashon, presentashon i eksposishon. Remarkabel, biní di un persona sin preparashon akadémiko i ku a hasié riba forsa propio. El a pionerá ku asina tantu solides i kredibilidat ku, despues ora antropologia ya a desaroyá direkshon paden enbes di pafó, e mira adelantá riba su tempu akí di Juliana tabatin basta tempu na vigor kaba. Juliana disípulo a someté su mes na otronan ku por a siñ’é kon ekskavá pa des-kubrí historia. Komo outodidakta el a prepará i praktiká te ora e por a agregá mas kapasidat na su totalidat. E informashon kolekshoná i dokumentá, elevá na nivel di siensia, a haña ainda mas sustansha pa motibu dje filosofia amplio, basá riba historia, análisis, komparashon regional i internashonal i reflekshon profundo, ku a sostené.

Integrashon funshonal Juliana tabatin e konsiensia ku pa debolbé pueblo su herensia i konfiansa propio, mester hasié ku instrumentonan di kultura popular mes i ku e mésun variedat di medio i konstansia ku e kondishonamentu kolonial a tuma lugá. Durante dékadanan largu el a eduká adulto i mucha ku medionan imaginabel i otronan inventivo di su mes kreashon. Juliana poeta i eskritor a produsí masha tipo di literatura, konsiente kon instrumental e arte akí por ta pa transmití mensahe. Igualmente Juliana etnomusikólogo, deklamadó, presentadó, skultor i pintor a uza arte visual i eséniko pa komuniká riba tur tema. El a realisá ku tur elemento di eksistensia humano ta relatá na otro i ta den integrashon funshonal Juliana a transmití mensahe dje nesesidat pa rekonkistá mente pèrdí, tantu pa pueblo di Kòrsou, Antia komo di Karibe. Elis Juliana a presta di ta forma i kontenido, kreadó i presentadó, alumno i maestro pareu, di krea i re-kreá, re-inventá su mes kada bes di nobo, agregando dimenshonnan nobo i mustra otronan ehèmpel pa tambe hasi esaki. Of manera el a deskribí e aktitut holístiko akí : “Mi mes ta’ tur kos pareu: tambú i letra.”

Konstansia pa Kontinuidat Ku e dokumentashon, análisis i inbestigashon amplio kreá Juliana a pèrkurá pa generashonnan aktual i benidero por kontinuá e reskate ku el a inisiá i asta ekstendé esaki na ainda mas tereno. E kolekshon vasto di Juliana so i Juliana huntu ku Brenneker a pone fundeshi pa mas inbestigashon. Re-inventando su mes el a imortalisá su mes i kultura di Kòrsou i Antia tambe. Semper lo tin elemento nobo pa eksplorá. Ta un movementu ketu bai rehubenesedó, ta dinámika i futuro.

Elis Juliana a krea paradigmanan nobo pa motibu di firmesa di prinsipio, insistensia i konstansia ku a okashoná alolargu un evolushon di kantidat pa kalidat: ‘Esei bo ta bin sa despues’, bálido pa no solamente Kòrsou i Antia, sino Karibe i kualke otro parti di mundu interesá den inbestigashon di kultura popular.

I ku e paradigmanan akí por konstatá ku e dies terenonan ku Juliana tabata aktivo riba dje a eksperenshá un kambio despues di aktividatnan di Juliana, manera e profeshonalnan sitá anteriormente a indiká. Segun nan, por señalá un influensha signifikativo i un marka notabel ku Juliana a laga riba kada aria riba su so i, integrando e ku otronan, hasié asina muchu mas kompleto i diferente di ‘solamente’ e aria ku e tabata promé.

Koriente A base di loke nan a señalá, por papia di un modelo nobo, un konsepto kreá pa inbestigadó i artista Juliana. Un modelo konseptual basá riba konsiensia emansipatorio, integrashon funshonal i konstansia ku ta garantisá kontinuidat.
Pues por bisa ku Juliana tabatin i tin un influensha konstante i riba hopi tereno di siensia, arte i komportashon, ku su influensha tabatin e forsa di laga praktikadónan dje tereno pensa i aktua diferente i konsekuentemente ta kambia e tereno. Un influensha, basá riba un filosofia di potensialidat, ku ta konektá terenonan anteriormente no konektá ku otro i krea asina posibilidat pa lanta un otro tereno. Den kurso di tempu julianismo a haña i lo sigui tin diferente manifestashon. Wan shete fishi ta julianismo, Wazo ta julianismo, Ompi Elis ta julianismo.
Pa e forsa ku trabou di Juliana tin pa influenshá i transformá durante dékadanan tereno di bida, siensia i arte ta hustifiká papia di un koriente nobo ku ta hiba di nòmber: Julianismo, na su fundador. Su elementonan prinsipal ta konsiensia, integrashon i kontinuidat. Konsiensia pa logra soberania individual i komo pueblo, integrashon di tur elemento ku por tin un funshon den konsientisashon i konstansia, garantia pa mantene kontinuidat.

Mérito julianismo Si identifiká e influensha ariba menshoná mas aleu por bisa ku su propósito tabatin komo meta sera e ‘buraku hundu’ den memoria kolektivo. Un memoria ku promé ku kolonisashon tabata konektá bida den presente ku tradishon di ansestronan i tabata pèrkurá pa kontinuidat. Kolonisashon i sklabitut a dal manera meteor den i rementá suela dje tradishonnan menshoná i e impakto a okashoná un imenso buraku den mente. Konosementu i rekonosementu propio ta ousente Ta e trouma akí a pone ku hende di aki a skohe pa lubidá tur loke ansestronan a laga patras pa sigurá kontinuashon den bida. Esakinan ta forma huntu e suela identifikadó. Drei kara otro banda i bisa: esei a pasa ku mi antepasadonan den un tempu tras di lomba, no a funshoná. E tempu por ta tras di lomba, su efektonan sí no! E siguiente figura ta ilustrá e proseso den kua e liña di traspaso ta gravemente interumpí:

 

 
Ansestronan ku suela firme di nan tradishonnan bou di nan pia. Bashí kousá pa kolonialismo i sklabitut. Kurasoleño di aktualidat sin suela firme di tradishonnan bou di pia.
Juliana a kontribuí pa kubri e buraku den mente kolektivo, pa eliminá e desorientashon magno, presente te awe. Juliana a bai drumi abou pa sera e buraku den memoria kolektivo di Kòrsou tantu ku su trabou, komo ku su bida. El a skohe pa forma parti dje suela firme ku ta sera e bashí pa asina kurasoleñonan por kana di un banda dje abismo, yega e otro banda, rekuperá nan herensia i krea un futuro sólido. Esaki ta e prinsipal mérito di julianismo:
Ansestronan ku suela firme
firme di nan tradishonnan bou di nan pia.JulianismoKurasoleño di aktualidat ku suela firme di tradishonnan bou di nan pia.Kurasoleño di futuro.

Esaki ta e liña di konsiensia, integrashon i kontinuidat. I den e konteksto akí por bisa pues ku apesar di tur premio, kondekorashon, rekonosementu i dedikashon ku Elis Juliana a risibí durante su karera, no ta sigur ku komo kolektivo ainda Kòrsou/Antia a kapta su real esensia. No ta sigur ku komunidat sa ainda realmente ku ta eksistí un julianismo, kiko e ta enserá i kon nos por benefisiá di dje. I si esaki no ta e kaso – i tin tur probabilidat ku ta asina – no ta di straña. Edukashon nashonal no a pone prioridat ainda riba e reskate akí. Afortunadamente por konstatá tambe ku hopi persona a eksperenshá Juliana mésun hundu ku el a revelá su mes. Nan a eksperenshá efekto di julianismo, sea identifiká komo tal òf no i kontinuá su trabou.

Tesoro humano bibu Nos ta na solamente inisio dje proseso nesesario pa studia julianismo. Komprenshon di magnitut dje trabou akí dje persona multidimenshonal Elis Juliana ta kresiendo i falta hopi kompletashon ainda. Direktor di Museo Nashonal di Arkeologia i Antropologia ke proponé UNESCO Antia i na su turno UNESCO Internashonal proklamá Elis Juliana ‘Tesoro Humano Bibu’. Den e dokumental dje mésun título un siudadano ta kontestá riba e pregunta “Mener konosé Elis Juliana?”: “Elis Juliana? Su solo ta grandi!